عشــــــــق البنــــات.. - موسوعة عالم حواء

**დ đlз bηάтyαţ ღ** · 10-10-2007, 08:00 AM

حبيبي...
مشتاقتلك
والشوق موت
معاد فيني أنتظر
حاولت لكن ماقويت ...!!
حاول تحس
حاول تفهم حالتي
" بنت عشقت " .... !!
تدري إذا البنت عشقت وش ممكن يصير ...!
يووووووه لوتدري وش عشق البنات ....
موت ... وحياة ....!!
وأشياء ابد ماتنوصف ...!!

تبي تعرف البنت إذا دشت هوى ...!تنثر لها دمعة ...حلوووووه تشبه لحبات المطر ...
بس دافيه حيل ...!!
وتشري لها شمعة ...لونها وردي ...
وتفرح إذا هي تحترق ...!!
وتجلس بغرفتها كثير .... تصحى وتنام ....!!
ودايم كسل ...
وتضحك شوي ... وتبكي شوي ...!!
وتقول احياناً كلام هي نفسها " ماتفهمه " ...!!
وتغير العطر القديم ...
وتكره ملابسها القديمة ...!!
وتشري لها دفتر جديد
وتكتب عليه .... بعض الطلاسم ... والحروف
والباقي كله شخبطة ...!!
وتموت بالليمون ... والشاهي الخفيف ....
وتقرأ شعر .... كله غزل
وتقول يووووووووووووه ...!!

الله على عشق البنات ...
يحليلهم ....
مرة يحبون الهوى ...
وإذا دخلوه ضاعوا ولادلوا طريق ....!!
إمشي على شط الهوى ... وشوف البنات
هذيك غرقانه
وهذي تصيح
والثالثة تمشيء وتطيح
وبحر الهوى ملعون مايرحم احد ....!!
يموت في قتل البنات
عرفت وش عشق البنات...!!

أعرف انا وحده عشقت ... وبغت من الفرحة تطير ....
فديتها كانت صغيرة حيل ....
واللي تحب بعد صغير ...!!
وتواعدوا ... وتعاهدوا ....
وبنوا من الفرحة خيااااال
واختاروا اسماء العيال ...
ومشى العمر وهم سوى يبنون احلام وامل ....
وفجأة صحوا من حلمهم ....
يقول أُمي مارضت ...
ويقول صعب اتزوجك ...
يمكن عرفتي غيري رجالٍ كثير ....!!
حتى إتهمها بالخيانة ...
معقولة العاشق يخون ...!
وعشقٍ مضى بلحظة يهون...!
بكت ... بكت ... بكت ....!!
إلين دمعتها يبست ...
من جد ماعنده ضمير ...!!

حبيبي ...!!
تدري بشيء...!
انا بصراحه خايفه ...
اخاف يوم تتركني على جال الطريق ...
وترحل بعيد ... وتصبح مثل باقي الرجال ...
ماتفهم قلوب البنات ...
تدري اش يصير ...!
والله لأموت من القهر ...
وابكي على معنى الهوى ...
وآخذ عزى كل البنات ....!!
وأكتب رساله للقمر ...
واقوله
" لاتنخدع من الرجال مهما وصفوك ...
ومهما تغنوا في بهاك ...
باكر يخلونك تموت من القهر ....
مثل البنات "

[عزيزي الزائر يتوجب عليك التسجيل لمشاهدة الرابط للتسجيل اضغط هنا] ........ [عزيزي الزائر يتوجب عليك التسجيل لمشاهدة الرابط للتسجيل اضغط هنا]

**نونه حنونه** · 10-10-2007, 12:39 PM

الله تسلم انااااااااااملك
دلع روعه واعجبتني عزيزتي
والله انك صااادقه بكل حرف

**დ đlз bηάтyαţ ღ** · 10-10-2007, 02:24 PM

ياهلاوغلا نووونه حنووونه اكيد قلبي صادقه بكل حرف احنا عشقنا غيير والله
موزي ذالتماسيح مالت وع .. <<<اموون..هعهع

بس فيه تماسيح تحب من قلب بس نادرا بهالزمن ويابخت الي تلقى شخص من هالنادرين بس ماتوقع..<<متشائمه بقوووووووه..

لكن احنا فديتنا كلنا احسااااااااس ولاحبينا حبينا ...

منورتني حبيبتي

**بنت كيوت** · 10-11-2007, 04:49 PM

روعه يادلع الرياض

اسطر عذبه .. بكلمات رقيقه ..
تحمل مشاعرا متدفقه من قلب ينبض بالحب ,,
كلمات قلبت كياني وانا أمتع ناظري بها ,,

ويالله يابنات ... أنا جيت
وكلي سواليف ... وغلا

حبيت ...
ورب السماء حبيت
الحين أنا بسكة سفر ...و يمكن تطول ...!!
الله ... يا حلو السفر ... بالذات إذا هو في هواه ...!!
الله على دموع البنات إذا عشقوا ...
أحسها ماهي دموع ...
أحسها حبة مطر ... كله طهر ...
حتى سوالفهم غير ...
ويبدون في يومٍ جديد ... وحلمٍ جديد .. ونظراتهم من جد تتغير كثير ...
تصير مرة جارحة ... واحيان تبقى سارحة
يا ربي وش حلو البنــــــــــــات ... يجننون
فيهم غلا ... وملح ... وحلا ...
ما حطه الله فـ أحدٍ غيرهم
إذا ضحكوا ... وإذا بكوا .. وإذا عشقوا .. وإذا مشوا ..
وإذا وقفوا ... وإذا زعلوا ... وإذا رضوا
وحتى إذا انقهروا بعد ياربي عليهم
سبحان من سوى البنات ...!!

ويااااه لو تدرون عن حلمٍ حلمته ... البارحة
والله خطير
والبارحة ماهي مجرد حلم ... البارحه ميلاد ...!!
والبارحة سكة سفر ... ودربٍ طويل
شوفوا فديت عيونكم ...
وش رايكم في غرتي ...؟! وفستاني ...؟! وعطري ...؟!
كله جديد ... كله
كل شي تغير في نجود
كل القديم اللي احبه اليوم أنا صرت أكرهه
اليوم انا ماني نجود .. اليوم انا فيني هوى وعشقٍ جديد
حتى اسمي غيرته بعد ..ا ليوم انا إسمي عهد

وقطعت لعيون الهوى وعد ... وعهد
إني ما اخون
وابقى على دربي الجديد
وعشقي الجديد
وعطري وفساتيني الجديده
وأنتم ... وش آخر سواليف الهوى معكم ...؟!
تدرون ...؟!
أنا عشقت البارحة
والبارحة ياصار شيء ...!!
البارحة بس ( انا ضحكت )
والبارحة بس ( انا بكيت )
والبارحة بس ( سهرت لين الصبح )
اثر الهوى مجنون ...؟!
سمعت من وحدة تقول:
( إن الهوى مثل الربيع ينبت على شفاه البنات وإذا ضحكوا طاح الكرز )
وسمعت من وحدة تقول:
( إن الهوى مثل العطر يفوح بانفاس البنات وإذا حكوا فاح العطر )
وسمعت من وحدة تقول
( إن الهوى هو سبب موت البنات وإذا عشقوا ماتوا قهر )
و وحدة تقول .. وأُخرى تقول
والحين أنا فعلاً عشقت
وانا اللي خلوني أقول
تدرون وش معنى الهوى ...؟!
( موت وحياة ...
وانا عمري القديم ... وقلبي القديم ماتوا جميع البارحة ..
والبارحة انا حييت ... بعمرٍ جديد ...
وقلبٍ جديد .. وعشقٍ مثل طعم العسل ...!!
وأثر الهوى عين العقل .. وهم يقولون الهوى دايم جنون ...!!
وحتى إذا عشقي جنون ... يبقى الجنون عين العقل ...!!
واثر الهوى كله عبث ..لكن يجي منه فنون )
الله على العشق النظيف ...!!
عشقت لي واحد قمر ...!!
رجال ... مو رجال بس ...!!
وربي يـ هو كل الرجال ...
كله احاسيس ... وغلا .. كله وله... زرع على شفاهي الدلال
إذا ضحكت ... يبكي .. ياربي عليه
وإذا بكيت ... يموت.. وعساي انا قبله أموت ...!!
وإذا لمس كفي بعض كفه شهق ...بسم الله عليه
وقام يهذي ...!! ويقول لي أحلى قصيد
وإذا انتهى ... يرجع يعيد
إليـــــــــــــــــن انام
تدرون البارحة وش قال لي ...؟!
البارحة قال : ( تكفين ودي تزعلين ...!!
وإذا انا غالي عليك لعيوني تكفين ازعلي ...!!
تدرين ليش ...؟!)
بصراحة خفت ... وقلت..( ليش ...؟!)
يقول :
( ابا اتلذذ وانا اطلب رضاك ... وربي لـ سوي كل شيء ... إلين ماترضى علي ...!!
وحتى إذا صار ورضيتي ...بـ ارجع بعد وازاعلك ...
واعود أطلب لك رضاك ...!!واسوي كل اللي تبين ... بس ازعلي
خليني انعم بـ الزعل ... وانعم إذا ترضين ...)
وربي جنون ...!! شفتوا الهوى وشلون ...؟!
حتى في وقت الزعل يحلى الهوى ...ويحلى بعد إذا رضيت ...!!
ياربي وش هالحظ الحلو ...؟!
احس انا فعلاً حييت ...!!
كان الزهر اسود ... والليل هم ... وكانت سواليفي حكي ...
واحلامي شتات ..
الله على عشق البنات ... موت وحياة ...!!
يا الله نوموا يابنات .. بروح أنا في غرفتي
أجلس انا وقلبي جميع ... بلحالنا
نقراء دواوين الشعر ..ونضحك سوى ... ونبكي سوى ...

ونـنــــــــــــام ونتغطى باحاسيس البنات إذا عشقوا ...!!
ونذوق لو مرة دفى ...!! :icon116:

**დ đlз bηάтyαţ ღ** · 10-11-2007, 06:18 PM

ياهلا بنوته كيوت وتسلمين ع الرووعه الي كاتبتها..

**قويت** · 10-16-2007, 10:08 PM

[align=center]
غاليتي .. دلووعة الرياض

لابداعك احساس خاطب روحي
فوجدتني اسطر خربشات حاولتْ محاوره احرفك
فقط ..
مجرد هذيان يحاكي بعضا من نزفك
مع ثقتي انها لاتصل الى جمال ما أمتعتنا به!!
حروفي تتراجع خجلا أمــــــامـ بحر مشاعرك الراقيه
التي لازلت أقرأها للمره الألــــــــف
ولمـ اكتفي..!!
دمت مبدعــــــــــــــه
لك من الأماني أرقهــــــا
واعذبهـــــا

لك مني أرق وأعذب التحايا
قويت[/align]

**დ đlз bηάтyαţ ღ** · 10-17-2007, 03:51 AM

[عزيزي الزائر يتوجب عليك التسجيل لمشاهدة الرابط للتسجيل اضغط هنا]
[عزيزي الزائر يتوجب عليك التسجيل لمشاهدة الرابط للتسجيل اضغط هنا]
يــــاهلاوغلا قوووووووووويت تشرفت بمرووورك..

لــــــن اكووون الاقطـــــــره في بحـــــر ابدااااااعك..

اميره الاضواء · 10-17-2007, 04:03 AM

[align=center]روووووووووعه

اسمحي لي اصفق لك بحراره
كتبتي فابدعت يالغلا

سجليني في قائمتك
من المعجبين بخاطرتك

اميره الاضواء[/align]

**დ đlз bηάтyαţ ღ** · 10-17-2007, 07:21 AM

ياهلاوغلا امييييييره الاضواء

تسلميييييين عيوووني..

**أمووورهـ** · 10-25-2007, 05:39 PM

[align=center]والله ابدااااااااااااااااااااااااااااااااااااااااااااااع
يعطييييييييييك العافيه دلووووووووووووووووووع

تحيااااااااااااااااااااااااااااااتي
أمووورهـ[/align]

اسلاميات	الشعر والادب	عالم حواء	الجوال	الالعاب
البرامج	دليل المواقع العربية	دليل المواقع الاجنبية	مركز تحميل	ألبوم الصور
مكتبة الصور	الماسنجر	السمايلز	الخليج العربي	الوطن العربي
الاسرة المسلمة	الطفل	الموسوعة الطبية	موسوعة الحج	تفسير القرآن الكريم
منتدى الافلام	منتدى بناتيات	منتدى الشعر والادب	فقه الصيام	صانع الصور
الافلام	الفيديو	يوتيوب	البريد	اتصل بنا

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

الذين يشاهدون محتوى الموضوع الآن : 1 ( الأعضاء 0 والزوار 1)